Passatempu

La notti c’arriva cu ciatu di ventu
Cu cori di vitru luna di malabbentu
Lu jornu chi curri cu passi di focu
Cu vuci d’addevi addumati di jocu

Lu ‘mmennu chi porta acqua e malatia
Luci senza caluri nivi e malincunia
L’astati chi veni t’asciuca lu chiantu
D’austu lu scettru di stiddi lu mantu

Malutempu la morti malutempu ‘u rancuri
Duna tempu a lu tempu li minuti e li uri
Passatempu la vita passatempu l’amuri
Duna tempu a lu tempu galantomu e signuri

La morti ammucchiata dintra visina e fami
Chi t’agguanta la gola strinci cu li so’ mani
P’ogni vita biniditta c’è qualcunu chi prea
‘Na cannila di cira la to’ vita e la mea

La vigghia chi jiapri lu so’ ‘nfernu di luci
Di suduri e di sangu a cu porta la cruci
La notti chi jinchi la to’ testa d’amuri
‘Na prumissa di paci jorna senza duluri

Malutempu di fangu malutempu di feli
Di galera di scantu raggia e carabineri
Passatempu di suli passatempu di meli
Pi’ st’anticchia di tempu t’arrialassi lu cori